ക്രിസ്തുവിൽ പ്രത്യാശിച്ചു ജീവിച്ചാൽ...

പ്രത്യാശ എന്നാൽ വിശ്വാസത്തോടെയുള്ള പ്രതീക്ഷ. പ്രതീക്ഷിക്കുന്ന കാര്യങ്ങൾ ഒരു പക്ഷേ നടന്നില്ലെന്ന് വരാം. എന്നാൽ ക്രിസ്തുവിൽ നാം പ്രത്യാശിക്കുന്നത് തീർച്ചയായും സംഭവിക്കും. ക്രിസ്തുവാണ് നമ്മുടെ പ്രത്യാശ. ഭൗതികമായ കാര്യസാധ്യങ്ങളെ അല്ല നാം പ്രത്യാശിക്കുന്നത് ഒരു ക്രിസ്തു വിശ്വാസിയുടെ പ്രത്യാശ എന്നത്  നിത്യത തന്നെയാണ്. എന്നാൽ നാം ഭൂമിയിൽ ആയിരിക്കുമ്പോൾ ഭൗതികമായ നന്മകളും ആവശ്യം തന്നെയാണ്. ആത്മീകനന്മകൾ അനേഷിച്ചു നാം പോകുമ്പോൾ മറ്റുള്ളതെല്ലാം നമ്മെ അന്വേഷിച്ചു വരും.

മത്തായി 6:25,31,33

• അതുകൊണ്ടു ഞാൻ നിങ്ങളോടു പറയുന്നതു: എന്തു തിന്നും എന്തു കുടിക്കും എന്നു നിങ്ങളുടെ ജീവന്നായിക്കൊണ്ടും എന്തു ഉടുക്കും എന്നു ശരീരത്തിന്നായിക്കൊണ്ടും വിചാരപ്പെടരുതു; ആഹാരത്തെക്കാൾ ജീവനും ഉടുപ്പിനെക്കാൾ ശരീരവും വലുതല്ലേയോ?
• ആകയാൽ നാം എന്തു തിന്നും എന്തു കുടിക്കും എന്തു ഉടുക്കും എന്നിങ്ങനെ നിങ്ങൾ വിചാരപ്പെടരുതു.
• മുമ്പെ അവന്റെ രാജ്യവും നീതിയും അന്വേഷിപ്പിൻ; അതോടുകൂടെ ഇതൊക്കെയും നിങ്ങൾക്കു കിട്ടും. 

നാം ക്രിസ്തുവിനെ രക്ഷിതാവായി സ്വീകരിച്ചത്, നിത്യനാശത്തിൽ അകപ്പെടാതിരിപ്പാൻ, അവൻ യാഗമായി നമുക്ക് നിത്യരക്ഷ ഉറപ്പാക്കി എന്ന പ്രത്യാശയുള്ളതിനാലാണ്.

1 കൊരിന്ത്യർ 15:20-23

•  എന്നാൽ ക്രിസ്തു നിദ്രകൊണ്ടവരിൽ ആദ്യഫലമായി മരിച്ചവരുടെ ഇടയിൽനിന്നു ഉയിർത്തിരിക്കുന്നു.
•  മനുഷ്യൻമൂലം മരണം ഉണ്ടാകയാൽ മരിച്ചവരുടെ പുനരുത്ഥാനവും മനുഷ്യൻമൂലം ഉണ്ടായി.
•  ആദാമിൽ എല്ലാവരും മരിക്കുന്നതുപോലെ ക്രിസ്തുവിൽ എല്ലാവരും ജീവിപ്പിക്കപ്പെടും.
•  ഓരോരുത്തനും താന്താന്റെ നിരയിലത്രേ; ആദ്യഫലം ക്രിസ്തു; പിന്നെ ക്രിസ്തുവിന്നുള്ളവർ അവന്റെ വരവിങ്കൽ;

1 തെസ്സലൊനീക്യർ 4:13 - 14

• സഹോദരന്മാരേ, നിങ്ങൾ പ്രത്യാശയില്ലാത്ത മറ്റുള്ളവരെപ്പോലെ ദുഃഖിക്കാതിരിക്കേണ്ടതിന്നു നിദ്രകൊള്ളുന്നവരെക്കുറിച്ചു അറിവില്ലാതിരിക്കരുതു എന്നു ഞങ്ങൾ ആഗ്രഹിക്കുന്നു.
• യേശു മരിക്കയും ജീവിച്ചെഴുന്നേൽക്കയും ചെയ്തു എന്നു നാം വിശ്വസിക്കുന്നു എങ്കിൽ അങ്ങനെ തന്നേ ദൈവം നിദ്രകൊണ്ടവരെയും യേശുമുഖാന്തരം അവനോടുകൂടെ വരുത്തും.

ഒരു വിശ്വാസിയെ ജീവിക്കാനും കഷ്ടങ്ങളിലും രോഗങ്ങളിലും പതറാതെ നിൽപ്പാനും സഹായിക്കുന്നത് ക്രിസ്തു യേശുവിൽ അവർ അർപ്പിച്ചിരിക്കുന്ന പ്രത്യാശയാണ്.

നമ്മെ ഈ ലോകജീവിതത്തിൽ താങ്ങി നിർത്തി നിത്യത എന്ന വലിയ യാഥാർഥ്യത്തെ പ്രത്യാശിക്കുവാൻ ധൈര്യം തരുന്ന വചനങ്ങൾ

 1 തെസ്സലൊനീക്യർ 4:16-17

•  കർത്താവു താൻ ഗംഭീരനാദത്തോടും പ്രധാനദൂതന്റെ ശബ്ദത്തോടും ദൈവത്തിന്റെ കാഹളത്തോടുംകൂടെ സ്വർഗ്ഗത്തിൽനിന്നു ഇറങ്ങിവരികയും ക്രിസ്തുവിൽ മരിച്ചവർ മുമ്പെ ഉയിർത്തെഴുന്നേൽക്കയും ചെയ്യും.
• പിന്നെ ജീവനോടെ ശേഷിക്കുന്ന നാം അവരോടു ഒരുമിച്ചു ആകാശത്തിൽ കർത്താവിനെ എതിരേല്പാൻ മേഘങ്ങളിൽ എടുക്കപ്പെടും; ഇങ്ങനെ നാം എപ്പോഴും കർത്താവിനോടുകൂടെ ഇരിക്കും.

ദാനീയേൽ 12:2

നിലത്തിലെ പൊടിയിൽ നിദ്ര കൊള്ളുന്നവരിൽ പലരും ചിലർ നിത്യജീവന്നായും ചിലർ ലജ്ജക്കും നിത്യനിന്ദക്കുമായും ഉണരും.

എന്നാൽ നാം പ്രത്യാശയോടെ മാത്രം ജീവിച്ചാൽ നിത്യത ലഭിക്കയില്ല. അതിനു ലോകമോഹങ്ങളും ദൈവത്തിന്റെ വചനത്തിനു ആകാത്തതുമായ പ്രവർത്തികളിൽ അകപ്പെടാതെ നമ്മെ തന്നെ സൂക്ഷിക്കണം.

1 യോഹന്നാൻ 2:15-17

• ലോകത്തെയും ലോകത്തിലുള്ളതിനെയും സ്നേഹിക്കരുതു. ഒരുവൻ ലോകത്തെ സ്നേഹിക്കുന്നുവെങ്കിൽ അവനിൽ പിതാവിന്റെ സ്നേഹം ഇല്ല.
• ജഡമോഹം, കണ്മോഹം, ജീവനത്തിന്റെ പ്രതാപം ഇങ്ങനെ ലോകത്തിലുള്ളതു എല്ലാം പിതാവിൽനിന്നല്ല, ലോകത്തിൽനിന്നത്രേ ആകുന്നു.
• ലോകവും അതിന്റെ മോഹവും ഒഴിഞ്ഞുപോകുന്നു; ദൈവേഷ്ടം ചെയ്യുന്നവനോ എന്നേക്കും ഇരിക്കുന്നു.

1 യോഹന്നാൻ 3:3

അവനിൽ ഈ പ്രത്യാശയുള്ളവൻ എല്ലാം അവൻ നിർമ്മലനായിരിക്കുന്നതുപോലെ തന്നെത്തന്നേ നിർമ്മലീകരിക്കുന്നു.

തീത്തൊസ് 2:12-13

•  നാം ഭാഗ്യകരമായ പ്രത്യാശെക്കായിട്ടും മഹാദൈവവും നമ്മുടെ രക്ഷിതാവുമായ യേശുക്രിസ്തുവിന്റെ തേജസ്സിന്റെ പ്രത്യക്ഷതെക്കായിട്ടും കാത്തുകൊണ്ടു
• ഭക്തികേടും പ്രപഞ്ചമോഹങ്ങളും വർജ്ജിച്ചിട്ടു ഈ ലോകത്തിൽ സുബോധത്തോടും നീതിയോടും ദൈവഭക്തിയോടുംകൂടെ ജീവിച്ചുപോരേണ്ടതിന്നു അതു നമ്മെ ശിക്ഷിച്ചുവളർത്തുന്നു.

ഭോഷ്കില്ലാത്ത ദൈവം സകലകാലത്തിന്നും മുമ്പെ വാഗ്ദത്തം ചെയ്ത നിത്യജീവന്റെ പ്രത്യാശ (തീത്തൊ 1:2) എല്ലാപേരേയും വിശ്വാസത്തിൽ നിലനിർത്തിക്കൊണ്ട് പ്രാപിക്കാൻ സഹായിക്കട്ടെ. Amen